Честит и вековит 8-ми септември!

Република Македонија одбележува 17 години од стекнувањето на независност по спроведениот референдум на кој македонските граѓани се изјаснија за самостојна и суверена држава!

Над 95 отсто од граѓаните што излегоа на референдумот на 8 септември 1991 г. потврдно одговорија дека се за самостојна Македонија со право да стапи во иден сојуз на суверени држави на Југославија, како што беше и референдумското прашање.

Десет дена подоцна референдумскиот резултат го потврди Собранието на Република Македонија, а веќе на 17 ноември 1991 година беше донесен и новиот устав на државата.

Единствена дамка на овој светол датум за Р. Македонија остави бојкотот на референдумот од страна на дел од албанската етничка заедница.

Македонија како независна држава прва ја призна Република Бугарија, по што следуваа признавања и од Турција, Словенија, Хрватска и Русија.

На 8 април 1993 година кога со акламација во Генералното собрание на Обединетите нации, Македонија беше примена за 181 полноправна членка на Светската организација.

Седумнаесетиот роденден на независна Македонија денеска ќе се одбележува со многубројни свечености од кои централната ќе биде вечерва на плоштадот „Македонија“ во Скопје.