Вечерва Македонија vs. Холандија

По саботниот триумф против Шкотска во премиерниот натпревар од новиот кавалификациски циклус за пласман на Светското првенство во Јужна Африка во 2010 година, македонската фудбалска селекција вечер на Градскиот стадион во Скопје ја пречекува Холандија.


Ова ќе биде трет дуел меѓу Македонија и Холандија, една од најсилните светски репрезентации која во моментов е рангирана на четвртото место на листата на ФИФА. Претходните два беа во кавлификациите за Мундијалот во Германија и завршија без победник. Во Скопје пред четири години беше 2:2, а година подоцна во Амстердам 0:0.

Во споредба со шкотските навивачи видно е намалено и присуството на фановите на "лалињата" низ центарот на Скопје. Дел од оние, пак, кои веќе пристигнаа во Скопје и удобно се сместија во скопските кафулиња пројавија сомнеж во победата на нивните пулени.

Вакви информации пристигнуваат и од Холандија, каде во анкета само 56 отсто од испитаниците изјавиле дека веруваат во победа на нивниот национален тим против Македонија, а високи 42 отсто не веруваат во победа на нивната репрезентација на "Градски".

Македонија е во деветата квалификациска група во која покрај Холандија, се и Шкотска, Норвешка и Исланд. Во Јужна Африка ќе оди само првопласираната селекција во групата. Натпреварот Македонија - Холандија почнува во 20:30 часот, а дитектно ќе го пренесува ТВ Сител.