Алкохол не смее да се продава по 19 часот

by **ast3rix** Пон Jул 21, 2008 4:04 pm

Предвидени се казни и за родителите чии деца ќе бидат фатени да купуваат алкохолни пијалаци.

Трговците на мало и граѓаните што од 19 часот до 6 часот ќе продаваат, односно купуваат алкохол ќе платат казна од 300 евра. Ова е дел од измените во Законот за трговијата, кои почнаа да се применуваат од денеска.

Со измените Министерството за економија сака да ја доуреди и во извесен степен да ја ограничи продажбата на алкохол во одредени периоди и места и за малолетниците. Во врска со продажбата на алкохол на малолетни лица, која досега беше казнива со закон, отсега се предвидуваат и казнени мерки и за родителите чии деца ќе бидат фатени да купуваат алкохолни пијалаци.

Според последните измени на Законот за трговијата, алкохол ќе смее да се продава само во продавници што имаат дозвола од Министерството за економија. За да поседуваат дозвола за продажба на алкохол, трговците ќе треба да платат по 20 илјади денари.

Лиценците ќе бидат со времетраење од две години. Трговците на мало што ќе поседуваат ваква дозвола неа ќе мора да ја истакнат на видно место или, во спротивно, ќе мора да платат казна или да останат без лиценца. Забраната за продажба на алкохол од 19 до 6 часот нема да важи за рестораните и за кафеаните. Но, затоа отсега алкохол не смее да се продава на пазарите, бензинските станици и во киосците.

При подготовката на измените на условите за продажба на алкохол отфатени во Законот за трговијата граѓански здруженија бараа и поголема ригорозност за трговијата со алкохол.

Еден од нивните главни мотиви беше да се намалат или елиминираат продажбата и точењето алкохол на малолетни лица. Тие го сметаа за пропуст и тоа што Министерството за економија не предвидува казнени одредби за продажбата на алкохолни пријалоци и во близина на основните и средните училишта во државата.

Невладините здруженија се залагаа за поригорозни казни и за нерегистрираното, односно, за производството на алкохол во домовите.